RedNUDES

Eztabaida hau plazaratzen dugu mutil askok hartu duten defentsa jarrera lasaitzeko eta planteatzeko zeinen urgentea den gizonezkoek bat egitea gizonen eta emakumeen arteko berdintasun errealarekin. Konplizitatea da gakoa eta antzerkiak bidea erraztu dezake.

“Gizonen Taldea” —berezko izaera duen pertsonaia— elementu nagusia da, beste guztien gainetik, identitate maskulinoak eraikitzeko garaian; izan ere, taldeak zelatatu eta zentsuratu egiten ditu bere kideek emozioak eta harremanak maneiatzeko orduan izan ditzaketen desbideratze guztiak. Disidentzia oro zigortuko da. Kultura matxista erreproduzitzen duten faktoreen artean gizonen arteko leialtasun aliantza da, segur aski, gainditzen zailena.

Era berean, hitz egin nahi dugu gizon talde jakin batzuk feminismoaren aurka —eta feminismoak gizartean betetzen duen rolaren aurka— bultzatzen ari diren konfrontazioaz, eta eztabaidara ekarri zenbait sektore maskulinotan (Manosfera) sortzen ari diren diskurtso eta erreakzio atzerakoiak. Fenomeno erreakzionario hori sareetan sortu da maskulinitate tradizionalaren krisiari erantzuna emateko. Sareetan benetako influencer gisa jokatzen duten tipo toxikoak dabiltza, eta mutil gazteek haiei kopiatzen dizkiete generoen arteko berdintasunean eman diren aurrerapausoen aurkako argudioak, sexu indarkeria guztiak legitimatzen dituzten diskurtsoak artikulatuz.

Halaber, zeharka bada ere, planteatu nahi dugu pornografiak baduela eragina gazteek kontsentimendua ulertzeko modu desitxuratuan eta haien arteko praktika sexual hertsatzaileen normalizazioan. Pornografiak indarkeria sexuala betikotzen duten genero estereotipoak indartzen ditu.

Ikuskizunaren trama nagusia — kontakizunaren haria — Sexpreading fenomenoaren inguruan egituratzen da: “Bideo eta argazki intimo konprometituak eta lapurtuak, kontsentimendurik gabe publikatu eta sareetan biralizatzen direnak, irudiak jasotzen dituztenak kitzikatzeko asmoarekin”. Nudeen eskaera esponentzialki hazten ari den praktika da, eta horrek alarma piztu du ikastetxeetan eta areagotu ditu ikasleen arteko gatazkak.

Ikuskizuna osatzeko, teknikari eta bitartekari ekipo batek landutako material didaktiko zabala prestatu dugu, lagungarri gerta daitekeelakoan antzezlana ikusi ondoren ikasgeletan gazteen arteko eztabaida piztu eta bideratzeko.

RedNUDES13 eta 17 urte bitarteko publikoari zuzendutako areto ikuskizuna da eta euskaraz zein gaztelaniaz aurkez daiteke. Ikuskizunaren tonua eta diskurtsoa gazteei zuzenduta dago, baina jorratzen diren gaien gaurkotasunak eta tratamendu zuzenak zer pentsatua emango die ikusle helduei ere.